დარგში განხორციელებული ცვლილებები

2023 წლის 1 ივლისიდან საქართველოში ვირტუალური აქტივის მომსახურების პროვაიდერის საქმიანობა რეგულირებადი გახდა (იხ. „საქართველოს ეროვნული ბანკის შესახებ“ საქართველოს ორგანული კანონი და საქართველოს ეროვნული ბანკის პრეზიდენტის 2023 წლის 13 ივნისის ბრძანებით დამტკიცებული „ვირტუალური აქტივის მომსახურების პროვაიდერის საქართველოს ეროვნულ ბანკში რეგისტრაციის, რეგისტრაციის გაუქმებისა და რეგულირების წესი“). რეგულაციები ძირითადად ემსახურება ორ მიზანს: 

1. უზრუნველყოს ვირტუალური აქტივის მეშვეობით ფულის გათეთრებისა და ტერორიზმის დაფინანსების აღკვეთა.

ვირტუალური აქტივის მომსახურების პროვაიდერის მომხმარებლებმა მომსახურების მისაღებად იდენტიფიკაცია/ვერიფიკაციის პროცესი უნდა გაიარონ, ხოლო მათი გარიგებები (ოპერაციები) AML (ფულის გათეთრების საწინააღმდეგო) შემოწმების პროცედურებს დაექვემდებარება.

2. ვირტუალური აქტივის მომსახურების საქმიანობის სხვა, მსგავსი ფინანსური აქტივობებისა და საქმიანობებისგან გამიჯვნა.

ვირტუალური აქტივის მომსახურების პროვაიდერის საქმიანობა მკაცრად გამიჯნულია სხვა, მსგავსი ხასიათის ბიზნესსაქმიანობებისგან, როგორიცაა გადახდების პროვაიდერის მომსახურება, საბროკერო საქმიანობა და სხვ. ამასთან, ვირტუალური აქტივის მომსახურების პროვაიდერს არ ექნება შესაძლებლობა, განახორციელოს ფიატური ფულის შენახვა ან/და ოპერირება/ადმინისტრირება. 

შპს „კოინმანია“ საქმიანობას შეუფერხებლად აგრძელებს. ამ ეტაპზე დაგეგმილია რიგი აქტივობები, რომელთა მიზანია, ერთი მხრივ, კომპანიის საქმიანობის მარეგულირებელი კანონმდებლობის მოთხოვნებთან მაქსიმალური შესაბამისობის უზრუნველყოფა და მეორე მხრივ, აღნიშნული ცვლილებების მომხმარებლებისთვის, შეძლებისდაგვარად მოხერხებულ ფორმატში განხორციელება – მომსახურების ხარისხისა და პირობების გაუარესების გარეშე.

ჩვენ უწინდებურად ვაგრძელებთ მომხმარებლების მომსახურებას 24/7-ზე რეჟიმში. მომხმარებელთა მხარდაჭერის ჩვენი გუნდი კვლავ თქვენ გვერდითაა და მზადაა, დაგეხმაროთ ნებისმიერი კითხვისა თუ პრობლემის მოგვარებაში ამ გარდამავალ პერიოდში. შესაბამისად, მომსახურების მიღების კუთხით, ჩვენს მომხმარებლებს რაიმე სახის შეფერხებები ან შეზღუდვები არ შეექმნებათ.

ვირტუალური აქტივის მომსახურების პროვაიდერად რეგისტრაცია

კანონმდებლობის მიხედვით, კომპანიებს, რომლებიც 2023 წლის 1 ივლისის მდგომარეობით უკვე ახორციელებდნენ ვირტუალური აქტივის მომსახურების პროვაიდერის საქმიანობას, სარეგისტრაციო პროცედურების გასავლელად 3-თვიანი ვადა განესაზღვრათ (საქართველოს ეროვნული ბანკის შესახებ საქართველოს ორგანული კანონში ცვლილებების შეტანის შესახებ საქართველოს პარლამენტის 2022 წლის 9 სექტემბრის N1790-IXმს-Xმპ. რეგისტრაციის კოდი 220010000.04.001.018034). პროვაიდერად რეგისტრაციაზე გადაწყვეტილების მიღებამდე კომპანია მომხმარებლების შეუფერხებელ მომსახურებას აგრძელებს.

კოინმანიამ ვირტუალური აქტივის მომსახურების პროვაიდერად რეგისტრაციის პროცესი დაიწყო. აღნიშნული აქტივობის ერთ-ერთი მთავარი მიზანი, გარდა რეგისტრაციის მიღებისა, არის ჩვენი მომხმარებლების უსაფრთხოებისა და სტაბილურობის ხარისხის ამაღლება და ამავდროულად, მომსახურების მაქსიმალურად მოქნილი და მოხერხებული პირობების შენარჩუნება. 

ჩვენი მიზანია, გარდამავალ პერიოდში დარგში მიმდინარე ცვლილებები ჩვენი მომსახურების ხარისხისა და უსაფრთხოების გასაუმჯობესებლად გამოვიყენოთ. მომხმარებელთა ინტერესების მაქსიმალური დაცვის მიზნით, ახალი გამოწვევების ფონზე, კოინმანიის მომსახურება კვლავ რჩება მუშა, მოხერხებული და სანდო.